• Avoga por abordar as mellores prácticas de gobernanza, así como as estratexias para preservar o fondo mariño, pois o futuro depende da xestión sostible en todo o que ofrece o mar

• No marco da convocatoria vixente do FEMPA, o Goberno galego destinará ata 2026 a estes Grupos máis de 19,5 millóns de euros

O conselleiro do Mar, Alfonso Villares, destaca aos Grupos de Acción Local do Sector Pesqueiro como instrumento estratéxico na economía azul, en tanto son un motor de dinamización dos territorios e un recurso de desenvolvemento local para as persoas, entidades e concellos situados nas zonas costeiras.

O responsable autonómico inaugurou a Xornada do GALP Golfo Ártabro Norte: “O Potencial das Confrarías no Crecemento Económico e Social do Territorio. Diversificación cara unha Economía Azul”, na que tamén incidiu na importancia de abordar as mellores prácticas de gobernanza, así como as estratexias para preservar o fondo mariño, pois o futuro depende da xestión sostible de todo o que ofrece o mar.

O responsable autonómico detallou que estes Grupos engloban a 409 organizacións, da que 97 pertencen ao sector pesqueiro, representando a máis de 13.000 persoas traballadoras do mar.

Preto de 20M€ ata 2026

Ao abeiro desta iniciativa, expuxo, que, en 2023, se desenvolveron 64 proxectos cun investimento total que superou os 8 millóns de euros, e que, na convocatoria vixente, que corresponde ao Fondo europeo Marítimo, de Pesca e Acuicultura (FEMPA) 2021-2027, e que está, precisamente, destinada a permitir unha economía azul sostible nas zonas costeiras e fomentar o desenvolvemento das comunidades pesqueiras e acuícolas, a Consellería de Villares destinará máis de 19,5 millóns ata 2026.

Neste caso, o número de proxectos aprobados son 133, dos que ao GALP Ártabro Norte lle corresponde 16. En total, no marco destas axudas, que contan tanto co apoio de axudas públicas como privadas, mobilizaranse un total de 20,9 millóns de euros.