A directora xeral de Desenvolvemento Pesqueiro, Ángeles V. Suárez, e o director de Turismo de Galicia, Xosé Merelles, mantiveron unha xuntanza para establecer vías de colaboración entre os dous departamentos autonómicos para coordinar as actuacións sobre servizos e actividades turísticas, promovidos por axentes privados ou sen ánimo de lucro, que se realicen nas zonas pesqueiras no marco das axudas convocadas pola Consellería do Mar e nas que colaboran  os Grupos de Acción Local Pesqueira, cofinanciadas polo Fempa.

Así, ambos departamentos comprometéronse a analizar as posibilidades de colaboración para o desenvolvemento do turismo mariñeiro como elemento idiosincrático das zonas pesqueiras galegas e no marco das posibilidades que ofrece a economía azul, destacando a potencialidade do patrimonio, do traballo das xentes do mar e tamén do coñecemento relacionado cos recursos pesqueiros de Galicia.

Durante o encontro, o director de Turismo de Galicia trasladoulle á directora xeral de Desenvolvemento Pesqueiro o éxito de produtos e programas turísticos que teñen como base a cultura marítima, a súa tradición e tamén a actividade produtiva da comunidade.